11 қараша күні  кітапханамыз ерекше көңілді, шуақты әрі сиқырлы күйге бөленді! Бізге ең кішкентай әрі білуге құмар оқырмандарымыз — Павлодар қаласының N57сәбилер бақшасы Көптілде тәрбиелеу орталығының тәрбиеленушілері қонаққа келіп, Kitap Talk форматында қызықты саяхатқа аттанды.

Бүлдіршіндер үшін кітап — жануарларға тіл бітіп, жақсылық әрқашан жеңіске жететін нағыз ғажайыптар әлеміне апаратын есік! Саяхатымыз қалай өтті: түрлі-түсті, әсем безендірілген кітаптарды парақтап, сүйікті ертегі кейіпкерлерімен таныстық; өз ойымызбен бөлісіп, алғашқы әсерлерімізді айтуды және кітап мұқабасының артында не жасырылғанын қиялдауды үйрендік; қызықты ойындар ойнап, жұмбақтар шештік және ертегі кейіпкерлерін сомдап, мәз-мейрам болдық; естелікке көптеген әдемі суреттерге түстік!

Балалардың көзіндегі шынайы қызығушылық пен қуаныш — біз үшін ең үлкен марапат. Кітап оқуға және мейірімді ертегілерге деген сүйіспеншіліктің дәл осы балғын шақтан басталатыны қатты қуантады!

Балабақша тәрбиешілері мен кішкентай қонақтарымызға керемет көңіл-күй мен риясыз күлкілері үшін алғыс айтамыз. Жаңа ертегілер әлеміне саяхаттауға тағы да күтеміз!